Gjatë një takimi me drejtuesit e Universitetit të Prizrenit “Ukshin Hoti”, kryetarja e Këshillit Shtetëror të Cilësisë (KShC), profesoresha Hasnije Ilazi ka thënë se prioriteti kryesor i institucionit që ajo drejton është kthimi i Agjencisë së Akreditimit në Asociacionin Evropian për Sigurimin e Cilësisë në Arsimin e Lartë (ENQA) dhe Regjistrin Evropian për Rritje të Cilësisë në Arsimin e Lartë (EQAR).

Kryetarja Ilazi tha se Agjencia e Akreditimit javën e fundit ka përditësuar planin dinamik për kthim në ENQA dhe EQAR dhe se është e kënaqur me nivelin e plotësimit të kritereve. Kreu i KShC-së ka kërkuar nga Kuvendi i Kosovës që me procedurë sa më të shpejt të miratojë Ligjin për AKA-në për t’i hapur rrugën miratimit të akteve nënligjore dhe dokumenteve strategjike.

Ushtruesi i detyrës së Rektorit të Universitetit të Prizrenit, Samedin Krrabaj tha se në këtë universitet pritet të ketë investime në infrastrukturë për të përmirësuar kushtet e studentëve dhe stafit akademik.

Drejtuesit e KShC-së janë takuar edhe me përfaqësuesit e studentëve të Universitetit të Prizrenit, të cilët kanë prezantuar preokupimet dhe idetë e tyre për përmirësimin e proceseve të sigurimit të cilësisë.

Anëtarja e KShC-së, profesoresha Krenare Pireva Nuçi, ka thënë se sugjerimet dhe idetë e studentëve zënë vend me shumë rëndësi në procesin e vendimmarrjes në këtë institucion.