Këshilli Shtetëror i Cilësisë (KSHC) i Agjencisë së Kosovës për Akreditim (AKA), më 17 janar 2025, mbajti në Tiranë mbledhjen e 133-të, ku shqyrtoi dhe aprovoi Planin e Aktiviteteve për vitin 2025. Gjatë mbledhjes u diskutuan edhe çështje të rëndësishme që lidhen me proceset e akreditimit dhe sigurimin e cilësisë në arsimin e lartë.

Një ndër pikat kryesore të mbledhjes ishte miratimi i Planit të Aktiviteteve të përbashkëta ndërmjet administratës së AKA-së dhe KSHC-së. Ky plan do të shërbejë si udhërrëfyes për zhvillimet strategjike dhe operacionale në proceset e sigurimit të cilësisë në arsimin e lartë.

Gjatë mbledhjes, Këshilli gjithashtu trajtoi një sërë kërkesash dhe shqyrtoi ankesat e institucioneve të arsimit të lartë, duke garantuar një qasje transparente dhe objektive në procesin e vendimmarrjes.

Në këtë mbledhje u shqyrtuan raportet e ekspertëve për akreditimin institucional si dhe raportet e ekspertëve ndërkombëtarë mbi procedurat e pas-akreditimit. Po ashtu, Këshilli vendosi për themelimin e një Nënkomiteti Këshilldhënës të KSHC-së, i cili ka qenë rekomandim i ekspertëve të Asociacionit Evropian për Sigurimin e Cilësisë në Arsimin e Lartë (ENQA) dhe i cili synon të adresojë sfidat dhe kërkesat me efikasitet të shtuar.

Kjo mbledhje përfaqëson një hap të rëndësishëm drejt forcimit të standardeve ndërkombëtare të cilësisë dhe integrimit të tyre në sistemin e arsimit të lartë në Kosovë.