Në kuadër të vizitave në institucionet e arsimit të lartë, Këshilli Shtetëror i Cilësisë (KShC) i Agjencisë së Kosovës për Akreditim, vizituan të enjten Kolegjin AAB, me qëllim të diskutimit të çështjeve që lidhen me standardet e cilësisë në arsimin e lartë.

Kryetarja e KShC-së, profesoresha Hasnije Ilazi, ka thënë se institucioni që ajo drejton, i trajton me shumë seriozitet sugjerimet e IAL-ve, në funksion të cilësisë në arsimin e lartë.

Kryetarja Ilazi ka thënë se Kosova, ndonëse vendi më i vogël në rajon, investon shumë në standardet e cilësisë, pasi që i gjithë procesi i akreditimit është i bazuar në vlerësimet dhe rekomandimet e ekspertëve ndërkombëtarë.

Kreu i KShC-së tha se aktualisht janë duke ndodhur shumë zhvillimi pozitive në AKA, siç është draftimi i Ligjit për AKA-në, Plani Strategjik trevjeçar, krijimi i metodologjisë së re të monitorimit të IAL-ve, zhvillimi i standardeve të reja të akreditimit, riakreditimit dhe validimit të programeve akademike, etj.

Kryetari i Këshillit Drejtues të Kolegjit AAB, profesori Lulzim Tafa, foli për historikun e këtij institucioni në funksion të dhënies së kontributit në fushën e arsimit, shkencës dhe kulturës.

Ai e ka mirëpritur iniciativën e KShC-së, për të marrë sugjerimet e IAL-ve për çështje të cilat kanë të bëjnë me arsimin e lartë. Për mbarëvajtjen e punëve në Kolegjin AAB kanë folur tre prorektorët, shefja e Zyrës për Cilësi dhe sekretari i Kolegjit.

Gjatë vizitës në AAB, drejtuesit e KShC-së janë takuar edhe me përfaqësuesit e studentëve, të cilët kanë dhënë idetë e tyre për zhvillimin e sistemit të arsimit të lartë.