Agjencia e Kosovës për Akreditim (AKA), në bashkëpunim me studentët e Fakultetit të Inxhinierisë Elektronike dhe Kompjuterike të Universitetit të Prishtinës, si dhe me përkrahje teknike nga Fakulteti i Gazetarisë i UP-së, ka përgatitur video-spote promovuese që pasqyrojnë rolin dhe angazhimin e saj në sigurimin e cilësisë në arsimin e lartë.

Qëllimi i këtyre videove promovuese është sensibilizimi i studentëve në të gjitha institucionet e arsimit të lartë lidhur me rëndësinë e bashkëpunimit me AKA-në në procesin e përmirësimit të vazhdueshëm të cilësisë në arsimin e lartë në Republikën e Kosovës.

Për Agjencinë e Kosovës për Akreditim, roli i studentëve në përmirësimin e vazhdueshëm të cilësisë është thelbësor. Në këtë drejtim, AKA ka krijuar mekanizma për pranimin e sugjerimeve dhe ankesave nga studentët, të cilat kontribuojnë në ruajtjen e standardeve të akreditimit, përmirësimin e rezultateve të të nxënit dhe avancimin e kushteve të studimit.

Në realizimin e këtyre videove promovuese kanë marrë pjesë studentët: Hira Bekolli, Anesa Jakupi, Endrit Tytyngjiu, Eldi Kryeziu dhe Drenis Bajrami.

Agjencia e Kosovës për Akreditim i fton të gjithë studentët që, për informata lidhur me akreditimin, të vizitojnë ueb-faqen zyrtare akreditimi.rks-gov.net, ndërsa sugjerimet dhe vërejtjet e tyre mund t’i adresojnë përmes emailit: monitorimi.aka@rks-gov.net