Kryetarja e Këshillit Shtetëror të Cilësisë (KShC) e Agjencisë së Kosovës për Akreditim (AKA), profesoresha Hasnije Ilazi, anëtari i KShC-së Gëzim Tosuni dhe drejtori i AKA-së, Naim Gashi kanë zhvilluar një takim me Konferencën e Rektorëve të universiteteve publike në Kosovë, me të cilët kanë diskutuar për avancimin e proceseve të vlerësimit të jashtëm që ndikojnë në ngritjen e cilësisë në arsimin e lartë.

Kryetarja Ilazi ka thënë në takim se partneriteti i AKA-së me institucionet e arsimit të lartë, zbatimi i politikave dhe standardeve evropiane të cilësisë, po jep efekte pozitive në ngritjen e cilësisë në programet e studimit. Ajo ka thënë se Agjencia e vlerëson lartë bashkëpunimin me të gjitha IAL-të dhe është e përkushtuar për transparencën e plotë me të gjithë akterët e arsimit të lartë.

Kryesuesi i Konferencës së Rektorëve, njëherësh Rektor i Universiteti të Shkencave të Aplikuara në Ferizaj, profesori Agron Bajraktari, i falënderoi përfaqësuesit e AKA-së për bashkëpunimin deri më tani, si dhe gatishmërinë e tyre për të bashkëpunuar edhe në të ardhmen.

Rektori i Universitetit të Prishtinës, profesori Qerim Qerimi, ka thënë se procesi i akreditimit po ndikon në mobilizimin e të gjitha kapaciteteve të universiteteve në funksion të ngritjes së cilësisë në programet e studimit.