Agjencia e Kosovës për Akreditim (AKA) është shpallur fituese në dy projekte të reja të financuara në kuadër të programit Erasmus+ Capacity Building in Higher Education (CBHE), të cilat janë përzgjedhur për financim nga Komisioni Evropian.

Projektet Mikrokredencialet e Kosovës për inovacion në arsimin e lartë në fushën e teknologjisë së informacionit dhe komunikimit (KOSMIC) dhe Forcimi i qeverisjes dhe kapaciteteve profesionale për sigurimin e cilësisë në arsimin e lartë (GOV-QA) synojnë të kontribuojnë në avancimin e arsimit të lartë në Kosovë përmes zhvillimit të mikrokredencialeve, forcimit të qeverisjes institucionale dhe përmirësimit të sistemeve të sigurimit të cilësisë, në përputhje me standardet evropiane.

Pjesëmarrja e AKA-së në këto projekte dëshmon angazhimin e saj të vazhdueshëm për forcimin e cilësisë në arsimin e lartë, zhvillimin e kapaciteteve institucionale dhe mbështetjen e integrimit të sistemit të arsimit të lartë të Kosovës në Hapësirën Evropiane të Arsimit të Lartë (EHEA).

AKA do të bashkëpunojë me partnerët vendorë dhe ndërkombëtarë për zbatimin me sukses të këtyre projekteve dhe arritjen e rezultateve me ndikim afatgjatë.