Një delegacion i Agjencisë së Kosovës për Akreditim (AKA) ka marrë pjesë në Zagreb, në shënimin e 20-vjetorit të themelimit të Agjencisë për Shkencë dhe Arsim të Lartë të Kroacisë (ASHE).

Delegacioni i AKA-së përbëhej nga Kryetarja e Këshillit Shtetëror të Cilësisë (KSHC), prof. Hasnije Ilazi; Drejtori i Përgjithshëm i AKA-së, z. Naim Gashi; Udhëheqësja e Divizionit për Buxhet dhe Financa, znj. Merita Rama; dhe zyrtari i lartë për monitorim, z. Betim Sherifi.

Përfaqësuesit e AKA-së u pritën në një takim të veçantë nga drejtoresha e ASHE, znj. Danijela Horvatek Tomić, ku u diskutua për thellimin e bashkëpunimit ndërinstitucional, shkëmbimin e praktikave të mira dhe avancimin e proceseve të sigurimit të cilësisë në arsimin e lartë.

Në kuadër të aktiviteteve të 20-vjetorit u mbajt konferenca ndërkombëtare “Cilësia në Arsimin e Lartë dhe Shkencë: Nga sfidat te mundësitë – së bashku”, ku z. Naim Gashi mori pjesë si panelist i ftuar.

Drejtori i AKA-së u shpreh se Kosova ka krijuar një konsensus të gjerë nacional për sigurimin e cilësisë në arsimin e lartë, me të gjithë hisedarët që mbështesin reformat e ndërmarra — reforma që kanë sjellë përmirësim të dukshëm të renditjes ndërkombëtare të shumë universiteteve dhe kolegjeve në vend.

Ai vuri në dukje gjithashtu progresin e rëndësishëm të AKA-së, përfshirë forcimin e procedurave pasakredituese, rritjen e përfshirjes së studentëve dhe industrisë në vendimmarrje, si dhe modernizimin e proceseve të brendshme — zhvillime që kontribuuan në rikonfirmimin e regjistrimit të AKA-së në EQAR deri në vitin 2029.