Një delegacion i Agjencisë së Kosovës për Akreditim (AKA) po merr pjesë në punimet e konferencës ndërkombëtare të Asociacionit për Teknologji, Menaxhment dhe Inxhinieri Aplikative (ATMAE), e cila po mbahet në Orlando të Floridës në SHBA. ATMAE është institucion homolog i AKA-së, e cila bën akreditimin e të gjitha programeve akademike në fushën e teknologjisë dhe inxhinierisë në të gjithë Shtetet e Bashkuara.

Delegacioni i AKA-së, i përbërë nga drejtori Naim Gashi dhe zyrtari i lartë, Shkelzen Gërxhaliu, kanë zhvilluar takime të veçanta me drejtuesit e ATMAE, duke përfshirë z.Glenn Rettig, kryetar i Bordi të ATMAE, anëtarë të tjerë të Bordit, ekspertë të fusha të ndryshme dhe përfaqësues në universitetet të njohura amerikane. Një nga temat e takimeve ka qenë edhe mundësia e shkëmbimeve akademike, duke përfshirë zyrtarët, stafin akademik dhe studentët.

Po ashtu do të shikohet mundësia e përfshirjes së praktikave, metodologjive dhe kritereve të aplikueshme amerikane brenda kornizës rregullative aktuale të AKA-së, sidomos në fushën e teknologjisë dhe inxhinierisë.