Këshilli Shtetëror i Cilësisë (KShC) dhe stafi i Agjencisë së Kosovës për Akreditim (AKA), më 05.02.2025, në Bogë të Pejës, mbajti punëtori në të cilën është shqyrtuar rishikimi i Rregullores për Monitorim dhe Procedura Pas-akredituese.

Aktualisht AKA i ka të rregulluara procedurat e monitorimit dhe pas akreditimit, por qëllimi është që ato të harmonizohen me Ligjin për AKA-në dhe zhvillimet e reja të ngritjes së vazhdueshme të cilësisë në sistemin e arsimit të lartë në Republikën e Kosovës.

Rregullorja e rishikuar do të shërbejë si udhërrëfyes për AKA-në, institucionet e arsimit të lartë, ekspertët ndërkombëtarë si dhe publikun e gjerë për zbatimin e procedurave të drejta dhe transparente.

Kjo rregullore është në harmoni me Ligjin për AKA-në dhe në përputhje të plotë me Standardin 2.3 të Udhëzuesve Evropian të Sigurimit të Cilësisë në Arsimin e Lartë (ESG), i cili kërkon që agjencitë e sigurimit të cilësisë të përmbyllin ciklin e akreditimit me procedura pas akredituese.

Standardi 2.3 i ESG-ve, përcakton se forma e procedurave pas akredituese varet nga modeli i sigurimit të jashtëm të cilësisë, andaj AKA përmes këtij dokumenti rregullon procedurat e monitorimit të cilat i përshtaten plotësisht kontekstit dhe sistemit kosovar të sigurimit të cilësisë si dhe janë në përputhje me legjislacionin vendor në fuqi.

Punëtoria është përkrahur nga Projekti HEI 25, e cila financohet nga Agjencia Austriake për Zhvillim (ADA).