Kryetarja e Këshillit Shtetëror të Cilësisë (KSHC), profesoresha Hasnije Ilazi, Drejtori i Përgjithshëm i Agjencisë së Kosovës për Akreditim (AKA), Naim Gashi, dhe anëtarja ndërkombëtare e KSHC-së nga Kroacia, profesoresha Maja Martinović, janë pritur në Universitetin e Splitit, në një vizitë zyrtare që kishte për qëllim marrjen e përvojave kroate në zhvillimin e programeve të dyfishta dhe të përbashkëta të studimit në Kosovë.

Prorektori për shkencë dhe cilësi në Universitetin e Splitit, profesori Igor Jerković, vlerësoi se bashkëpunimi ndërmjet institucioneve të arsimit të lartë dhe agjencive të sigurimit të cilësisë është i rëndësishëm për zhvillimin e programeve bashkëkohore, veçanërisht atyre që lidhen me ndërkombëtarizimin, mobilitetin akademik dhe diplomat e përbashkëta.

Delegacioni i AKA-së u prit edhe nga Dijana Banovac, udhëheqëse e Departamentit për Menaxhimin e Cilësisë; Gordana Dujmović, udhëheqëse e Zyrës së Aleancës SEA-EU; si dhe profesori Mario Jeličić nga Fakulteti i Kineziologjisë, institucion ky që ka të zhvilluar një program të përbashkët me Lituaninë.

Në fokus të takimeve ishte shkëmbimi i përvojave lidhur me mënyrën se si institucionet e arsimit të lartë në Kroaci zhvillojnë, menaxhojnë dhe sigurojnë cilësinë e programeve të përbashkëta dhe të dyfishta të studimit.

Pjesë e diskutimeve ishte edhe roli i mekanizmave të brendshëm të sigurimit të cilësisë në vlerësimin dhe monitorimin e programeve të studimit, veçanërisht në rastet kur programet zhvillohen në bashkëpunim ndërmjet dy apo më shumë institucioneve të arsimit të lartë nga vende të ndryshme.

Kryetarja e KSHC-së, profesoresha Hasnije Ilazi, vlerësoi se bashkëpunimi me institucionet evropiane të sigurimit të cilësisë është një hap i rëndësishëm për forcimin e kapaciteteve të AKA-së dhe për mbështetjen e institucioneve të arsimit të lartë në Kosovë drejt zhvillimit të programeve më cilësore dhe më konkurruese.

Drejtori i Përgjithshëm i AKA-së, Naim Gashi, theksoi se përvoja kroate ka qenë shumë e dobishme në rrugëtimin e AKA-së drejt regjistrimit në Regjistrin Evropian për Sigurimin e Cilësisë në Arsimin e Lartë (EQAR) dhe njohjes nga Këshilli për Akreditimin e Arsimit të Lartë (CHEA) në SHBA.

Në kuadër të vizitës, delegacioni i AKA-së realizoi edhe një vizitë në kampusin e Universitetit të Splitit dhe në Fakultetin e Studimeve Detare, me qëllim të njohjes më të afërt me organizimin institucional dhe praktikat akademike të këtij universiteti.

Drejtuesit e AKA-së i ftuan drejtuesit e Universitetit të Splitit që të marrin pjesë në konferencën vjetore të AKA-së, e cila do të mbahet në shtator të këtij viti.