Asambleja e Përgjithshme e Asociacionit Evropian për Sigurimin e Cilësisë në Arsimin e Lartë (ENQA) ka zgjedhur më 23.10.2025 drejtoreshën e Agjencisë Rumune për Sigurimin e Cilësisë në Arsimin e Lartë (ARACIS), Cristina Ghițulică, Presidente të ENQA-së.

Drejtori i Përgjithshëm i Agjencisë së Kosovës për Akreditim (AKA), Naim Gashi, e ka mirëpritur zgjedhjen e presidentes Ghițulică, një partnere dhe mike e AKA-së, e cila kishte marrë pjesë në vitin 2023 në Konferencën Ndërkombëtare të AKA-së në Prishtinë.

Asambleja e ENQA-së ka zgjedhur gjithashtu edhe dy zëvendëspresidentë: Patrick Van den Bosch (VLUHR QA) dhe Kristin Vinje (NOKUT).

Në vigjilje të Asamblesë së ENQA-së, drejtori Gashi ka zhvilluar takime me homologë nga vende të ndryshme evropiane si Gjermania, Austria, Franca, Mbretëria e Bashkuar, Kroacia, Sllovenia, Irlanda, Belgjika, Rumania, Hungaria etj., si dhe me drejtuesit e ENQA-së dhe EQAR-it.

Takime të veçanta janë zhvilluar me presidentin e EQAR-it, Stéphane Lauwick, dhe me drejtorin e EQAR-it, Aleksandar Šušnjar.

Presidenti Lauwick e ka uruar drejtorin Gashi për regjistrimin e AKA-së në EQAR dhe ka theksuar se Kosova është një model i sigurimit të cilësisë në arsimin e lartë në rajonin e Ballkanit Perëndimor.

Gashi e ka falënderuar presidentin Lauwick dhe Sekretariatin e EQAR-it për njohjen e punës së AKA-së dhe gjithë sistemit të arsimit të lartë në zbatimin e standardeve evropiane të cilësisë.