Gjatë punimeve të Asamblesë së Përgjithshme të Rrjetit Ndërkombëtar të Agjencive për Sigurimin e Cilësisë në Arsimin e Lartë (INQAAHE), që po mbahet në Tokio të Japonisë, delegacioni i Agjencisë së Kosovës për Akreditim (AKA), është takuar me Presidenten e Asociacionit të Akreditimit të Universiteteve në Japoni (JUAA), Yoku Takahashi.

Presidentja Takahashi, e ka falënderuar delegacionin e Kosovës për vizitën në Japoni dhe ka ofruar gatishmërinë e saj për të bashkëpunuar në fushat e sigurimit të cilësisë në arsimin e lartë.

AKA është anëtare me të drejta të plota në INQAAHE dhe merr pjesë aktive në këtë organizatë, më e madhja në nivel ndërkombëtar në fushën e akreditimit dhe sigurimit të cilësisë në arsimin e lartë.

Ky takim është pjesë e angazhimit të vazhdueshëm të AKA-së për ndërkombëtarizimin e arsimit të lartë në Kosovë dhe për fuqizimin e bashkëpunimit me institucionet partnere në nivel global.

Konferenca e 18-të Bienale e INQAAHE po mbahet nga 13 deri më 16 maj 2025 në Qendrën e Konferencave Akasaka Intercity në Tokio, Japoni. E organizuar nga Asociacioni i Akreditimit të Universiteteve në Japoni (JUAA), kjo konferencë mbledh profesionistë dhe vendimmarrës nga e gjithë bota për të diskutuar zhvillimet më të fundit në sigurimin e cilësisë në arsimin e lartë.

Me temën “Teoria e Big Bengut: Ndryshimi i Paradigmës së Sigurimit të Cilësisë”, konferenca fokusohet në katër nën-tema kryesore: sigurimi i cilësisë dhe agjenda e qëndrueshmërisë; sigurimi i cilësisë dhe rrugët inovative të mësimit; sigurimi i cilësisë dhe inteligjenca artificiale; sigurimi i cilësisë dhe njohja e kualifikimeve dhe kredencialeve.

Këto tema synojnë të adresojnë sfidat dhe mundësitë për sigurimin e cilësisë në arsimin e lartë, duke përfshirë teknologjitë e reja, kërkesat për mësim fleksibël dhe nevojën për njohje ndërkombëtare të kualifikimeve.

Konferenca ofron një platformë për shkëmbimin e praktikave më të mira, diskutimin e inovacioneve dhe ndërtimin e partneriteteve ndërkombëtare në fushën e sigurimit të cilësisë në arsimin e lartë.

Pjesëmarrësit kanë pasur mundësinë të angazhohen në sesione interaktive, të ndjekin prezantime nga folës të njohur dhe të kontribuojnë në formësimin e të ardhmes së arsimit të lartë në një botë gjithnjë e më të ndërlidhur dhe teknologjikisht të avancuar.