Drejtuesit e Agjencisë së Kosovës për Akreditim (AKA) janë pritur në Podgoricë nga drejtuesit e Agjencisë së Malit të Zi për Kontroll dhe Sigurim të Cilësisë (ACQAHE) me të cilët kanë diskutuar bashkëpunimin ndërshtetëror në fushën e sigurimit të cilësisë në arsimin e lartë.

Delegacioni i Kosovës përbëhej nga Kryetarja e Këshilli Shtetëror i Cilësisë (KShC), profesoresha Hasnije Ilazi; anëtari i KShC-së, profesori Gëzim Tosuni dhe drejtori i AKA-së, Naim Gashi.

Nga pala e Mali të Zi në takim ishin profesoresha Nada Jaukovic, kryetare e Bordit Menaxhues të ACQAHE; zëvendësdrejtoresha Tijana Stankovic dhe këshilltarja e lartë për sigurim të cilësisë, Tamara Djurickovic.

Krerët e dy agjencive homologe janë pajtuar për nxitjen e bashkëpunimin në projekte rajonale, shkëmbimin e informatave, pjesëmarrjen në konferenca shkencore, nxitjen e shkëmbimeve të stafit akademik dhe studentëve etj.
Në këtë takim palët janë dakorduar për bashkëpunim në plotësimin e standardeve për anëtarësim në Asociacionit Evropian të Sigurimit të Cilësisë në Arsimin e Lartë (ENQA) dhe regjistrimin në Regjistrin Evropian për Sigurimin e Cilësisë në Arsimin e Lartë (EQAR).

Mali i Zi ka shprehur gatishmëri që të marrë pjesë në Konferencën Ndërkombëtare të AKA-së, e cila do të mbahet në Prishtinë më 26 tetor.