Në mbledhjen e 135-të të rregullt, të mbajtur më 10 mars 2025, Këshilli Shtetëror i Cilësisë (KSHC) i Agjencisë së Kosovës për Akreditim (AKA) ka miratuar versionin përfundimtar të Rregullores për Validim, si dhe ka aprovuar draftin e Rregullores për Monitorim dhe Procedura Pas-akredituese, i cili do të procedohet për diskutim publik.

KSHC ka shqyrtuar dhe adresuar të gjitha komentet e pranuara nga palët e interesit në lidhje me Rregulloren për Validim, përpara miratimit të draftit final. Kjo rregullore përcakton procedurat dhe kriteret e validimit në rastet kur një institucion i arsimit të lartë aplikon për vlerësim të jashtëm në nivel institucional apo për programe studimi nga një agjenci ndërkombëtare e akreditimit.

Gjithashtu, Rregullorja për Validim mbulon rastet kur një institucion i arsimit të lartë, i akredituar nga AKA, në partneritet me një universitet ndërkombëtar, vendos të ofrojë në Kosovë programe studimi të cilat, në vendin e origjinës, janë të akredituara nga agjenci ndërkombëtare të akreditimit.

Po ashtu, KSHC ka miratuar në parim Rregulloren për Monitorim dhe Pas-akreditim, e cila do të publikohet për konsultim me publikun dhe palët e interesuara. Kjo rregullore synon të vendosë mekanizma të drejtë dhe transparentë për proceset e monitorimit dhe pas-akreditimit, të cilat janë të harmonizuara me kontekstin e sistemit të sigurimit të cilësisë në arsimin e lartë në Kosovë, si dhe në përputhje të plotë me legjislacionin kombëtar. Qëllimi kryesor i saj është përmirësimi i vazhdueshëm i cilësisë në institucionet e arsimit të lartë.

Rregullorja për Monitorim dhe Pas-akreditim është në përputhje me Standardin 2.3 të Standardeve dhe Udhëzuesve Evropianë për Sigurimin e Cilësisë në Arsimin e Lartë (ESG), i cili kërkon nga agjencitë e sigurimit të cilësisë përmbylljen e ciklit të akreditimit përmes procedurave të pas-akreditimit, me fokus në rritjen e vazhdueshme të cilësisë së institucioneve të arsimit të lartë.

Gjatë kësaj mbledhjeje, KSHC ka shqyrtuar gjithashtu disa raporte të ekspertëve ndërkombëtarë të akreditimit, si dhe ka trajtuar ankesa dhe kërkesa të ndryshme të institucioneve të arsimit të lartë.

Mbledhja e 1354-të e KSHC-së do të vijojë edhe javën e ardhshme, me shqyrtimin e çështjeve të mbetura në rendin e ditës.

Shkarko dokumentin