Gjatë një punëtorie të mbajtur në Tiranë më 16.01.2025, Këshilli Shtetëror i Cilësisë (KSHC) i Agjencisë së Kosovës për Akreditim së bashku me stafin e AKA-së, i kanë shqyrtuar Rregulloren për Procedurat dhe Kriteret e Vlerësimit të Jashtëm nga Agjencisë Ndërkombëtare të Akreditimit, e cila njihet si Rregullorja për Validim dhe Rregulloren e re të KSHC-së.

Bazuar në Ligjin e AKA-së, Rregullorja për Validim përcakton procedurat dhe kriteret për njohjen e akreditimeve ndërkombëtare të institucioneve të arsimit të lartë dhe programeve të studimit.

Në këtë Rregullore përfshihen kriteret për njohjen e programeve të studimit të sjella në Kosovë nga universitetet partnere ndërkombëtare, të cilat janë të akredituara në vendin e tyre të origjinës.

Sipas rregullores, aplikimet për njohjen e akreditimeve ndërkombëtare shqyrtohen dhe vendosen nga KSHC.

Në këtë punëtori kanë marrë pjesë anëtarët vendorë dhe ndërkombëtarë të KSHC-së, duke përfshirë edhe anëtaren studente dhe përfaqësuesin e industrisë në Këshill. Në takim kanë marrë pjesë stafi i Agjencisë nga Departamenti për Akreditim dhe Departameti për Monitorim dhe Procedura Pas-Akredituese.

Këto dy rregullore do të dërgohen për diskutim publik për dy javë dhe do të publikohen në ueb faqen e AKA-së.

Punëtoria është përkrahur nga Projekti HEI 25 i financuar nga Agjencia për Zhvillim Ndërkombëtar e Austrisë (ADA).