Në ueb faqen zyrtare të Asociacionit Evropian të Sigurimit të Cilësisë në Arsimin e Lartë (ENQA) është vendosur edhe logoja dhe kredencialet e Agjencisë së Kosovës për Akreditim (AKA).

Kjo është mundësuar pasi që Bordi i ENQA i ka dhënë statusin “affiliate” Agjencisë së Kosovës për Akreditim.

Me rekomandimin e ENQA të gjitha vendimet dhe komunikimet e AKA do ta mbajnë edhe logon “ENQA Affiliate”.

Më 3 shtator 2022, drejtoresha e ENQA, Anna Gover, i ka konfirmuar drejtorit të AKA-së, Naim Gashi, se është pranuar aplikacioni i AKA-së për Statusin anëtar “affiliate”.

Ky vendim erdhi pasi që AKA ka bërë progres në zbatimin e rekomandimeve të ENQA dhe ka raportuar aktivitete konkrete për garantimin e cilësisë në arsimin e lartë konform standardeve evropiane të cilësisë (ESG).

ENQA u krijua për herë të parë në vitin 2000 si Rrjeti Evropian për Sigurimin e Cilësisë në Arsimin e Lartë për të promovuar bashkëpunimin evropian në fushën e sigurimit të cilësisë në arsimin e lartë.

Në vitin 2004, ajo u bë Asociacioni Evropiane për Sigurimin e Cilësisë në Arsimin e Lartë me synimin për të kontribuar në ruajtjen dhe rritjen e cilësisë së arsimit të lartë evropian dhe për të vepruar si një forcë kryesore lëvizëse për zhvillimin e sigurimin e cilësisë në të gjitha vendet nënshkruese të Procesit të Bolonjës.

Shiko ueb faqen e ENQA