Më 16 qershor 2025, Këshilli Shtetëror i Cilësisë (KSHC) i Agjencisë së Kosovës për Akreditim (AKA) mbajti mbledhjen e 138-të me radhë, në të cilën u shqyrtuan raportet e ekspertëve ndërkombëtarë të angazhuar në procesin e vlerësimit të programeve të studimit në institucionet e arsimit të lartë në Kosovë.

Në kuadër të kësaj mbledhjeje, KSHC shqyrtoi dhe mori vendime lidhur me raportet e ekspertëve ndërkombëtarë për akreditim fillestar dhe riakreditim të programeve të studimit, si dhe shqyrtoi ankesat dhe kërkesat zyrtare të paraqitura nga institucionet e arsimit të lartë në Republikën e Kosovës.

Procesi është zhvilluar në përputhje me standardet dhe udhëzimet e përcaktuara nga AKA, duke garantuar transparencë, objektivitet dhe përputhshmëri me praktikat evropiane të sigurimit të cilësisë.

Një ndër vendimet kryesore të kësaj mbledhjeje është se, duke filluar nga viti i ardhshëm akademik, programet master me 60 kredi ECTS do të mund të ofrohen vetëm nga ato institucione që posedojnë programe të studimit bachelor me 240 kredi ECTS në të njëjtën fushë akademike.

Ky vendim ka për qëllim të rrisë koherencën akademike dhe të sigurojë një bazë të qëndrueshme për ofrimin e studimeve pasuniversitare, në përputhje me parimet e Prosesit të Bolonjës.