Agjencia e Kosovës për Akreditim (AKA) më 31.07.2025 e ka përfunduar me sukses procesin e  deklarimit të stafit akademik në platformën elektronike E-Akreditimi, në përputhje me obligimet që dalin nga Ligji për AKA.

Gjatë periudhës 1–31 korrik 2025, 2983 anëtarë të stafit akademik nga të gjitha institucionet e arsimit të lartë në Republikën e Kosovës janë deklaruar me sukses në këtë platformë.

Ky proces është mbështetur teknikisht nga Agjencia Shtetërore për Informacion (ASHI), e cila menaxhon dhe mirëmban infrastrukturën digjitale dhe serverët e platformës “E-Akreditimi”.

Gjithashtu, stafi profesional i AKA-së, i udhëhequr nga z. Kastriot Ilazi, administrator i lartë për sisteme softuerike dhe bazë të të dhënave, ka ofruar asistencë teknike përmes emailit për 332 profesorë, si dhe ka ofruar ndihmë përmes komunikimeve telefonike për më shumë se 250 raste individuale.

Për të lehtësuar këtë proces, para hapjes zyrtare të platformës, AKA ka organizuar sesione trajnimi për koordinatorët e cilësisë në të gjitha institucionet e arsimit të lartë të akredituara në Kosovë, me qëllim të informimit dhe orientimit të tyre në përdorimin e platformës dhe në mbështetjen e stafit akademik gjatë procesit të deklarimit.

Agjencia e Kosovës për Akreditim shpreh falënderim të veçantë për koordinatorët institucionalë të cilësisë, për përkushtimin dhe bashkëpunimin e treguar, duke kontribuar që ky proces të përfundojë me efikasitet dhe transparencë të plotë.