Dy zyrtare të larta të Agjencisë së Kosovës për Akreditim (AKA), znj. Kaltrina Hyseni dhe znj. Leona Barbatovci, morën pjesë në Seminarin e organizuar nga Asociacioni Evropian për Sigurimin e Cilësisë në Arsimin e Lartë (ENQA) me temë “Dimensioni Evropian i Sigurimit të Cilësisë”, i cili u mbajt më 9 shtator 2025 në Bruksel, Belgjikë, në ambientet e Bibliotekës Mbretërore të Belgjikës.

Ky seminar mblodhi përfaqësues nga agjencitë dhe institucionet e sigurimit të cilësisë në të gjithë Evropën për të diskutuar zhvillimet më të fundit në politikat dhe praktikat e sigurimit të cilësisë në arsimin e lartë.

Temat kryesore përfshinë procesin e Bolonjës, prioritetet e Komisionit Evropian në fushën e arsimit të lartë, rolin e organizatave kryesore në Hapësirën Evropiane të Arsimit të Lartë, si dhe procesin e rishikimit të Standardeve dhe Udhëzuesve për Sigurimin e Cilësisë (ESG).

Gjatë këtij aktiviteti, përfaqësueset e AKA-së patën mundësinë të shkëmbejnë përvoja dhe të forcojnë bashkëpunimin me partnerë ndërkombëtarë. Në veçanti, ato zhvilluan takime me z. Aleksandar Šušnjar, Drejtor i EQAR, dhe znj. Anna Gover, Drejtore e ENQA, të cilët e uruan Kosovën për anëtarësimin në EQAR dhe vlerësuan kontributin e AKA-së në zhvillimin e mëtejshëm të sigurimit të cilësisë në rajon.

Pjesëmarrja aktive e Agjencisë së Kosovës për Akreditim në këtë seminar reflekton angazhimin e saj për forcimin e standardeve të cilësisë dhe përfaqësimin dinjitoz të Kosovës në skenën ndërkombëtare të arsimit të lartë.