Këshilli Shtetëror i Cilësisë (KShC) i Agjencisë së Kosovës për Akreditim (AKA), në mbledhjen e mbajtur më 23.02.2026, pasi ka shqyrtuar raportet e ekspertëve ndërkombëtarë ka vendosur për akreditimin për pesë vjet të Universitetit “Ukshin Hoti” në Prizren dhe të Akademisë së Kosovës për Siguri Publike (AKSP).

Në këtë mbledhje, KShC ka shqyrtuar edhe disa raporte të ekspertëve në nivel të programeve të studimit, duke marrë vendime përkatëse në përputhje me rekomandimet e paneleve vlerësuese. Po ashtu, është marrë në shqyrtim edhe një vendimi i Komisionit të Ankesave.

Anëtarët e KShC-së kanë diskutuar edhe rishikimin e aplikacioneve të ekspertëve për përfshirje në panelet vlerësuese, në funksion të forcimit të mëtejmë të kapaciteteve profesionale dhe garantimit të standardeve të larta në proceset e vlerësimit.

Në kuadër të pikave të politikave dhe rregulloreve, Këshilli është informuar lidhur me Planin e Zbatimit të Strategjisë së AKA-së, ndërsa ka vendosur për themelimin e dy grupeve punuese: një për hartimin e Rregullores për akreditimin e programeve të përbashkëta dhe programeve të dyfishta, si dhe një tjetër për organizimin e Konferencës së AKA-së 2026, e cila do të mbahet në fund të muajit shtator.

Gjithashtu, është vendosur caktimi i datës për takimin e rregullt me institucionet e arsimit të lartë (IAL).

KShC ka shqyrtuar edhe raportin mbi vizitat informuese në kuadër të monitorimit të institucioneve të arsimit të lartë, si pjesë e mekanizmave të vazhdueshëm të sigurimit të cilësisë.

Në funksion të plotësimit të përbërjes së KShC-së, është diskutuar përfshirja e përfaqësuesve të industrisë, si dhe shpallja e thirrjes për Bordin Këshillëdhënës të AKA-së.