Afati ligjor për deklarimin e stafit akademik në platformën e Agjencisë së Kosovës për Akreditim (AKA) ka përfunduar me sukses, duke rezultuar me regjistrimin e 2,960 pjesëtarëve të stafit akademik.

Sipas Ligjit për AKA-në, deklarimi i stafit akademik të të gjitha institucioneve të arsimit të lartë bëhet nga data 1 deri më 31 korrik të çdo viti. Si rezultat i modernizimit të platformës, stafi akademik ngarkon vetëm dokumentet që janë përditësuar ose ndryshuar nga viti paraprak.

E-Akreditimi është platforma elektronike e Agjencisë së Kosovës për Akreditim, e krijuar për digjitalizimin dhe administrimin e proceseve të akreditimit dhe të sigurimit të cilësisë në arsimin e lartë. Përmes kësaj platforme mundësohet regjistrimi dhe deklarimi i stafit akademik, dorëzimi i dokumentacionit, paraqitja e aplikimeve dhe menaxhimi i të dhënave që lidhen me institucionet e arsimit të lartë dhe programet e tyre të studimit.

Platforma ka mundësuar rritjen e efikasitetit, transparencën dhe saktësinë e proceseve të zhvilluara nga AKA-ja, duke reduktuar procedurat administrative dhe përdorimin e dokumenteve fizike. Njëkohësisht, ajo krijon një bazë të centralizuar të të dhënave, e cila mundëson administrimin, verifikimin dhe përditësimin më të lehtë të informatave gjatë proceseve të akreditimit dhe monitorimit të institucioneve të arsimit të lartë.