Prof. Avni Berisha, President i Këshillit Shtetëror të Cilësisë (KShC), dhe Arianit Krasniqi, Drejtor i Përgjithshëm i Agjencisë së Kosovës për Akreditim (AKA), morën pjesë në Asamblenë e Përgjithshme të Asociacionit Evropian për Sigurimin e Cilësisë në Arsimin e Lartë (ENQA), e cila u mbajt nga 21 deri më 23 tetor 2026 në Las Palmas de Gran Canaria, Spanjë.

Asambleja e Përgjithshme mblodhi përfaqësues të agjencive të sigurimit të cilësisë dhe palë të tjera të interesit nga e gjithë Evropa, për të diskutuar zhvillimet aktuale, sfidat dhe mundësitë për bashkëpunim në fushën e sigurimit të cilësisë në arsimin e lartë.

Gjatë këtij aktiviteti, përfaqësuesit e AKA-së morën pjesë në diskutime dhe shkëmbyen përvoja dhe praktika të mira me homologët evropianë lidhur me çështjet kryesore që përcaktojnë të ardhmen e sigurimit të cilësisë.

Këto diskutime ofruan mundësi për të reflektuar mbi rolin gjithnjë në zhvillim të agjencive të sigurimit të cilësisë në përballjen me ndryshimet në arsimin e lartë, nxitjen e bashkëpunimit ndërkufitar dhe garantimin që sigurimi i cilësisë të mbetet relevant, transparent dhe në përputhje me zhvillimet evropiane.

Me këtë rast, Agjencia e Kosovës për Akreditim përgëzon z. Péter Levente Lakatos për zgjedhjen e tij në pozitën e Presidentit të Bordit të ENQA-së, si dhe z. Ronny Heintze dhe znj. Varduhi Gyulazyan për zgjedhjen e tyre si anëtarë të rinj të Bordit të ENQA-së. AKA u dëshiron Presidentit dhe anëtarëve të rinj të Bordit suksese në përmbushjen e mandateve të tyre dhe shpreh gatishmërinë për vazhdimin e bashkëpunimit në avancimin e sigurimit të cilësisë në arsimin e lartë në mbarë Evropën.

Përmes angazhimit të vazhdueshëm në ENQA dhe në komunitetin më të gjerë evropian të sigurimit të cilësisë, AKA mbetet e përkushtuar ndaj avancimit të cilësisë së arsimit të lartë në Kosovë dhe mbështetjes së zhvillimit të një sistemi të arsimit të lartë të bazuar në cilësi, transparencë, llogaridhënie dhe përmirësim të vazhdueshëm.