Prishtinë, 8 Korrik 2025 – Agjencia e Akreditimit e Kosovës (AKA) ka publikuar sot listën zyrtare të programeve të akredituara për vitin akademik 2025/2026. Ky publikim është pjesë e angazhimit të vazhdueshëm të agjencisë për të ofruar transparencë, informim të drejtë dhe cilësi në arsimin e lartë në Kosovë.

Lista përfshin institucionet e arsimit të lartë publik dhe privat që kanë kaluar me sukses procesin e akreditimit institucional dhe programor, në përputhje me standardet kombëtare dhe ndërkombëtare të cilësisë.

Programet e akredituara janë të shpërndara në fusha të ndryshme studimi, duke përfshirë:

• Shkencat shoqërore
• Inxhinierinë dhe teknologjinë
• Shkencat natyrore
• Shkencat shëndetësore
• Biznes dhe ekonomi
• Edukimin dhe fushat tjera të rëndësishme për zhvillimin akademik dhe profesional të studentëve në Kosovë.

Të gjithë të interesuarit, përfshirë maturantët, studentët aktualë dhe prindërit, mund të qasen në listën e plotë të programeve përmes ueb faqes zyrtare të AKA-së: https://akreditimi.rks-gov.net/sq/home/, ku informacioni është i organizuar sipas institucioneve dhe cikleve të studimeve (bachelor, master, doktoratë).

AKA fton të gjithë qytetarët që të informohen drejt përpara vendimeve për regjistrim në ndonjë program studimi, duke u bazuar vetëm në programet e akredituara që janë pjesë e listës zyrtare. Programet që nuk figurojnë në këtë listë nuk gëzojnë status të akredituar dhe diplomimi në to nuk njihet nga institucionet shtetërore.

Për më shumë informacione ose sqarime, mund të kontaktoni zyrën për informim të AKA-së përmes emailit zyrtar apo numrave kontaktues të publikuar në ueb faqe.