Këshilli Shtetëror i Cilësisë (KSQ) i Agjencisë së Kosovës për Akreditim (AKA), më 08.10.2025, ka përfunduar mbledhjen e rregullt të 142-të, në të cilën janë shqyrtuar disa çështje të rëndësishme që lidhen me proceset e akreditimit dhe sigurimit të cilësisë në arsimin e lartë në Republikën e Kosovës.

Ndër pikat e diskutimit ishin shqyrtimi i disa raporteve të ekspertëve ndërkombëtarë të akreditimit, shqyrtimi i aplikimeve të reja për akreditim të programeve, si dhe atyre që ishin shtyrë nga mbledhja paraprake.

Këshilli, po ashtu, diskutoi raportet e monitorimit dhe raportet e procedurave pasakredituese për institucionet e arsimit të lartë, si dhe trajtoi kërkesat e paraqitura nga disa institucione.

Gjatë mbledhjes u bë gjithashtu rishikimi i aplikimeve për përzgjedhjen e ekspertëve vlerësues dhe u zhvillua një diskutim i gjerë mbi rezultatet e organizimit të Konferencës së Tretë Ndërkombëtare të Agjencisë së Kosovës për Akreditim, e cila u mbajt më 30 shtator.

Mbledhja përfundoi me shqyrtimin e çështjeve të tjera të rëndësishme që kontribuojnë në përmirësimin e vazhdueshëm të sistemit të sigurimit të cilësisë në arsimin e lartë në vend.