Agjencia e Kosovës për Akreditim (AKA) ka nisur procesin e akreditimit në nivel institucional, në përputhje me Standardet e Akreditimit të Institucioneve të Arsimit të Lartë dhe praktikat më të mira evropiane të sigurimit të cilësisë.

Në këtë fazë, tre ekipe të ekspertëve ndërkombëtarë janë angazhuar për të vlerësuar institucionet në bazë të 11 fushave të standardizuara që përfshijnë misionin, qeverisjen, planifikimin strategjik, menaxhimin financiar, integritetin akademik, kërkimin shkencor, personelin akademik, shërbimet studentore dhe burimet mësimore.

Ekspertët e përzgjedhur janë profesionistë eminentë me përvojë të gjerë në proceset e vlerësimit institucional dhe në zbatimin e standardeve të Zonës Evropiane të Arsimit të Lartë (EHEA). Angazhimi i tyre siguron një proces të paanshëm, transparent dhe të mbështetur në evidenca, siç kërkohet nga standardet e akreditimit institucional të AKA-së.

Procesi përfshin analizën e dokumenteve strategjike të institucioneve, vizitat në terren, takimet me përfaqësuesit akademikë, administrativë dhe studentët, si dhe verifikimin e përmbushjes së standardeve kyçe si: qartësia e misionit institucional, qeverisja, planifikimi financiar, cilësia e mësimdhënies, angazhimi kërkimor dhe mbështetja për studentët.

Me këtë proces, AKA synon të forcojë më tej integritetin e sistemit të arsimit të lartë në Republikën e Kosovës, të rrisë llogaridhënien publike dhe të garantojë që institucionet të jenë të përputhshme me standardet evropiane të cilësisë, duke kontribuar në vazhdimësi në rritjen e besueshmërisë ndërkombëtare të sistemit tonë të akreditimit.