Agjencia e Kosovës për Akreditim (AKA) gjatë kësaj jave po vlerëson katër programe të doktoratës në Universitetin e Prishtinës. Në proces të vlerësimit janë angazhuar një ekip i ekspertëve ndërkombëtarë të akreditimit, të cilët vijnë nga fushat përkatëse.

Në proces të vlerësimit janë Programi PhD në Shëndet Publik, në Fakultetin e Mjekësisë; Programi PhD në Kimi në FSHMN; dy programe në Fakultetin e Filologjisë: Programi PhD në Gjuhësi dhe Programi PhD në Letërsi.

Studimet e doktoratës janë një segment i rëndësishëm i sistemit të arsimit të lartë, që ndërlidhin arsimin, kërkimin shkencor dhe inovacionin. Është një pjesë esenciale e identitetit tradicional të një universiteti dhe në shumicën e vendeve evropiane, vetëm universitetet mund të japin një diplomë doktorature.

Programet e doktoratës duhet të zhvillohen dhe mirëmbahen duke përmbushur një sërë kriteresh, por është e rëndësishme të merret në konsideratë që puna kërkimore/hulumtuese shkencore është në epiqendrën e studimit të doktoratës. Për shkak të kësaj, elementët e procesit të cilësisë janë të ndryshme nga dy ciklet e para dhe specifike për programet e doktoratës.

Standardet për nivelin PhD që aplikon AKA ndahen në dy lloje, thelbësore dhe plotësuese. Në total, ekzistojnë 52 standarde: 36 standarde thelbësore dhe 16 standarde plotësuese. Të gjitha standardet thelbësore janë të detyrueshme për të arritur një vlerësim pozitiv në proces të akreditimit. Një program doktorate mund të akreditohet në rast të pajtueshmërisë së plotë ose substanciale.