Agjencia e Kosovës për Akreditim (AKA), duke u bazuar në Ligjin për Mbrojtjen e të Dhënave Personale, e ka hartuar dhe miratuar Udhëzuesin për Mbrojtjen e të Dhënave Personale.

Ky dokument përcakton procedurat dhe masat teknike e organizative që duhet të zbatohen për garantimin e sigurisë, konfidencialitetit dhe integritetit të të dhënave personale gjatë përpunimit dhe ruajtjes së tyre.

Udhëzuesi synon të forcojë mekanizmat e brendshëm institucionalë të AKA-së për mbrojtjen e të dhënave personale, duke siguruar që përpunimi i tyre të bëhet në mënyrë të ligjshme, transparente dhe vetëm për qëllime të përcaktuara.

Ai parasheh gjithashtu masa konkrete për menaxhimin e rrezikut, kontrollin e qasjes, raportimin e shkeljeve eventuale, si dhe përgjegjësitë e zyrtarëve në zbatimin e standardeve të mbrojtjes së të dhënave.

Në përmbajtjen e tij trajtohen edhe të drejtat e subjekteve të të dhënave personale, përfshirë të drejtën për informim, qasje, korrigjim, kufizim të përpunimit dhe transferim të të dhënave, në përputhje me legjislacionin në fuqi.

Po ashtu, udhëzuesi përcakton rolin e zyrtarit për mbrojtjen e të dhënave personale dhe masat që duhet të ndërmerren për garantimin e sigurisë në sistemet informative dhe në dokumentacionin fizik.

Me miratimin e këtij udhëzuesi, AKA riafirmon përkushtimin e saj për forcimin e përgjegjshmërisë institucionale dhe për zbatimin e standardeve të larta në mbrojtjen e të dhënave personale, në funksion të rritjes së sigurisë juridike, transparencës dhe besimit publik.

Udhëzuesi i AKA-së për Mbrojtjen e të Dhënave Personale do të publikohet në ueb-faqen e AKA-së pasi të merret konfirmimi nga Agjencia për Informim dhe Privatësi se përmbajtja e tij është në përputhje me Ligjin për Mbrojtjen e të Dhënave Personale.