Agjencia e Kosovës për Akreditim (AKA) ka qenë nikoqire e një paneli vlerësues amerikan nga Këshilli për Akreditimin e Arsimit të Lartë (CHEA) i Shteteve të Bashkuara të Amerikës, në kuadër të procesit për njohje si autoritet i akreditimit nga SHBA.

Paneli i përbërë nga Malina Monaco dhe Lucas Kavlie mori pjesë në mbledhjen e Këshillit Shtetëror të Cilësisë (KShC) të AKA-së, e cila u mbajt në Prishtinë më 23 shkurt 2026, për të vlerësuar përmbushjen e standardeve amerikane nga AKA.

Gjatë mbledhjes, ku morën pjesë fizikisht të gjithë anëtarët e KShC-së, ekspertët amerikanë vëzhguan nga afër procesin e vendimmarrjes, transparencën institucionale dhe përputhshmërinë e procedurave me standardet amerikane të sigurimit të cilësisë në arsimin e lartë.

Vizita u realizua në kuadër të aplikimit që AKA ka dorëzuar më 1 dhjetor 2025 për anëtarësim dhe për t’u njohur si autoritet nga Këshilli për Akreditimin e Arsimit të Lartë (CHEA), duke hyrë kështu në një proces të thellë dhe rigoroz vlerësimi ndërkombëtar.

Njohja si autoritet nga CHEA përbën një hap strategjik dhe me rëndësi të veçantë për sistemin e arsimit të lartë në Kosovë, pas regjistrimit të AKA në Regjistrit Evropian për Sigurimin e Cilësisë në Arsimin e Lartë (EQAR).

Si një nga institucionet më të rëndësishme në SHBA për njohjen e agjencive të akreditimit, CHEA vërteton standarde të larta të cilësisë dhe integritetit akademik.

Në rast se AKA bëhet autoritet i njohur nga CHEA, diplomat e studentëve kosovarë të lëshuara nga institucionet e akredituara do të kenë një nivel më të lartë pranueshmërie dhe besueshmërie në SHBA dhe në vende të tjera që i referohen standardeve amerikane të sigurimit të cilësisë.

Ky proces shënon një moment të rëndësishëm për ndërkombëtarizimin e arsimit të lartë në Kosovë dhe konsolidimin e pozitës së AKA-së si institucion kyç në garantimin e cilësisë dhe standardeve akademike në përputhje me praktikat më të mira globale.