Agjencia e Kosovës për Akreditim (AKA), më 18.11.2024 nisi procesin e akreditimit institucional në Universitetin e Prishtinës. Ky është akreditimi i parë që po zhvillohet me Standardet e reja të akreditimit të bazuara në Ligjin e ri të AKA-së.

Udhëheqëse e ekipit të ekspertëve që po vlerësojnë Universitetin e Prishtinës është profesoresha nga Universiteti i Zagrebit, Melita Kovacevic, ndërsa në përbërje të ekipit janë edhe Prorektorja e Universitetit të Bukureshtit, Magdalena Platis, profesori Mauro Zarreli nga Këshilli Nacional i Hulumtimit në Napolit të Italisë dhe studentja eksperte Marija Vasilevska.

Gjatë kësaj jave, dy ekipe të ekspertëve ndërkombëtarë të akreditimit do të vlerësojnë në nivel institucional gjashtë institucione të arsimit të lartë në Republikën e Kosovës, me standardet e reja të vlerësimit të cilat kanë hyrë në fuqi nga 1 tetor 2024.

Para se të fillojë procesi i vlerësimit, AKA ka organizuar trajnime për institucionet e arsimit të lartë, por janë trajnuar edhe ekspertët që marrin pjesë në procesin e vlerësimit.

Këshillit Shtetëror të Cilësisë (KShC) i AKA-së, në mbledhjen 116 të mbajtur më 25.09.2023, i ka miratuar Standardet për akreditimin/riakreditimin e institucioneve të arsimit të lartë në nivel institucional dhe të programeve të studimit bachelor dhe master.

AKA është kujdesur që në hartimin e standardeve të përfshihen anëtarët vendorë dhe ndërkombëtarë të KShC-së, ekspertë vendorë dhe ndërkombëtarë të fushës së arsimit të lartë, institucionet e arsimit të lartë, përfaqësues të shoqërisë civile, përfaqësuesit e studentëve, përfaqësues të MAShTI-it, donatorë të fushës së arsimit dhe të gjithë akterët tjerë relevantë për arsimin e lartë.