Prishtinë, 27 qershor 2025 – Agjencia e Kosovës për Akreditim (AKA) ka organizuar një trajnim me rastin e funksionalizimit të komponentës së aplikimit online për proceset e akreditimit nga institucionet e arsimit të lartë (IAL) në Republikën e Kosovës.

Trajnimi është mbajtur nga administratori për sistemet softuerike dhe bazën e të dhënave në AKA, z. Kastriot Ilazi, në bashkëpunim me stafin teknik mbështetës të Agjencisë. Në këtë aktivitet morën pjesë prorektorët dhe koordinatorët e cilësisë nga IAL-të publike dhe private të vendit.

Platforma e re digjitale mundëson aplikimin në distancë për akreditim dhe riakreditim institucional apo të programeve studimore, deklarimin e stafit akademik për secilin program, si dhe ndërlidhjen e drejtpërdrejtë me sistemet e Agjencisë së Regjistrit Civil (ARC) dhe Administratës Tatimore të Kosovës (ATK).

Përmes kësaj iniciative, AKA synon të avancojë më tej efikasitetin, efiçiencën dhe transparencën në sistemin e arsimit të lartë, duke lehtësuar ndërveprimin mes institucioneve dhe duke reduktuar ndjeshëm ngarkesën administrative.

Implementimi i kësaj platforme shënon përmbylljen e ciklit të digjitalizimit të proceseve të brendshme të AKA-së, duke krijuar një ekosistem të integruar funksional ku ndërveprojnë Agjencia e Akreditimit, Këshilli Shtetëror i Cilësisë (KSHC), institucionet e arsimit të lartë, studentët dhe publiku i gjerë.

Agjencia do të vazhdojë të ofrojë mbështetje teknike dhe trajnime shtesë për përdoruesit institucionalë, me qëllim që tranzicioni drejt sistemit të ri të jetë sa më i lehtë dhe efektiv.