Në kuadër të bashkëpunimit në fushën e sigurimit të cilësisë në arsimit në arsimin e lartë, me ftesë të Presidentit të Bordit të Agjencisë Amerikane të Akreditimit – ATMAE, Ahmad Zargari, Drejtori i Përgjithshëm i Agjencisë së Kosovës për Akreditim (AKA), Naim Gashi, ka marrë pjesë në Konferencën ndërkombëtare vjetore, që u mbajt në Las Vegas, e cila është një nga ngjarjet më të rëndësishme në Shtetet e Bashkuara në fushën e programeve të studimit për teknologjinë, menaxhimin dhe inxhinierinë e aplikuar.

Kjo konferencë është një mundësi e shkëlqyer për profesorë, administratorë, studentë, përfaqësues nga biznesi dhe industria, të cilët janë të pasionuar pas avancimit të njohurive dhe aftësive të tyre në këto fusha të studimeve.

Me një larmi të gjerë të pjesëmarrësve, konferenca ofron një platformë unike për rrjetëzim, bashkëpunim dhe shkëmbim idesh.

Në kuadër të bashkëpunimit me Agjencinë ATMAE, ekspertët amerikanë të akreditimit vijnë në Kosovë, në dy vitet e fundit, për të marrë pjesë në procesin e vlerësimit të jashtëm të programeve të studimit.