Përfaqësues të Agjencisë së Kosovës për Akreditim (AKA) morën pjesë në punëtorinë e organizuar nga Asociacioni Evropian për Sigurimin e Cilësisë në Arsimin e Lartë (ENQA), e cila u mbajt më 11 dhe 12 qershor 2025 në qytetin Tallinn të Estonisë.

Tema qendrore e punëtorisë ishte “Përdorimi i përgjegjshëm i inteligjencës artificiale në agjencitë e sigurimit të cilësisë”, duke trajtuar mundësitë dhe sfidat që sjell kjo teknologji në proceset e vlerësimit dhe akreditimit në arsimin e lartë.

Në këtë ngjarje të rëndësishme evropiane, AKA u përfaqësua nga Drejtori i Përgjithshëm, Naim Gashi; anëtarja studente e Bordit të AKA-së, Shkurtë Bajgora; si dhe udhëheqësit e divizioneve Merita Rama dhe Besim Jonuzaj.

Gjatë punëtorisë, përfaqësuesit e agjencive të sigurimit të cilësisë nga mbarë Evropa diskutuan për përdorimin etik dhe efektiv të inteligjencës artificiale, si dhe për ndikimin që ajo mund të ketë në vendimmarrje, transparencë dhe objektivitet në proceset e akreditimit.

U prezantuan gjithashtu praktika të mira dhe përvoja konkrete nga agjenci të ndryshme anëtare të ENQA-s, me qëllim të ndërtimit të një qasjeje të përbashkët evropiane për përdorimin e teknologjisë në arsimin e lartë.

Pjesëmarrja e AKA-së në këtë punëtori konfirmon përkushtimin e saj për të qëndruar në hap me zhvillimet më të fundit në fushën e sigurimit të cilësisë dhe për të përfituar mënyra inovative që mund të përmirësojnë proceset e akreditimit në përputhje me standardet evropiane.