Drejtuesit e Agjencisë së Kosovës për Akreditim (AKA) morën pjesë në seminarin e organizuar nga Asociacioni Evropian për Sigurimin e Cilësisë në Arsimin e Lartë (ENQA), ku prezantuan përvojën e Kosovës në procesin e vlerësimit të jashtëm dhe ndikimin e tij në përmirësimin e cilësisë në arsimin e lartë.

Nikoqir i këtij seminari ishte Agjencia Kombëtare për Vlerësimin dhe Akreditimin e Cilësisë në Spanjë (ANECA), ndërsa kanë marrë pjesë përfaqësues të ENQA, Regjistrit Evropian për Sigurimin e Cilësisë në Arsimin e Lartë (EQAR) dhe përfaqësuesit e agjencive nga mbarë Evropa.

Delegacioni i Kosovës u përfaqësua nga Kryetarja e Këshillit Shtetëror të Cilësisë (KSHC), profesoresha Hasnije Ilazi; Drejtori i Përgjithshëm i AKA-së, Naim Gashi; dhe Drejtori për Monitorim dhe Procedura Pas-akredituese, Shkelzen Gërxhaliu.

Gjatë prezantimit të tyre, përfaqësuesit e AKA-së theksuan konsensusin e gjerë kombëtar në Kosovë për sigurimin e cilësisë në arsimin e lartë, duke nënvizuar se procesi i vlerësimit nga ENQA ka shërbyer si katalizator për përmirësimin e politikave dhe zbatimin e standardeve evropiane për sigurimin e cilësisë (ESG).

Ata theksuan se ky proces ka ndihmuar AKA-në në avancimin e procedurave të saj të vlerësimit, në fuqizimin e transparencës dhe në ndërtimin e një kulture të përgjegjshmërisë institucionale.

Ngjarja në Madrid kishte për qëllim të ofronte udhëzime të vlefshme për agjencitë që pritet t’i nënshtrohen një rishikimi të jashtëm nga pranvera e vitit 2025 deri në vitin 2027. Pjesëmarrësit diskutuan mbi metodologjitë e rishikimeve të plota dhe të synuara, praktikat e mira në hartimin e raporteve të vetëvlerësimit dhe rëndësinë e një përgatitjeje të thelluar për procesin e vlerësimit.

Përfaqësuesit e AKA-së e vlerësuan këtë seminar si një mundësi të rëndësishme për shkëmbimin e përvojave dhe për forcimin e bashkëpunimit me agjenci të tjera evropiane, me qëllim avancimin e vazhdueshëm të cilësisë në arsimin e lartë të Kosovës.