Gjatë punimeve të takimit të gjashtë vendeve të Ballkanit Perëndimor, të organizuar nga Këshilli Rajonal për Bashkëpunim (RCC), që u mbajt më 24-25 prill 2025 në Zagreb të Kroacisë, Drejtori i Përgjithshëm i Agjencisë së Kosovës për Akreditim (AKA), Naim Gashi, prezantoi përvojën e Kosovës në procesin e vlerësimit nga Asociacioni Evropian për Sigurimin e Cilësisë në Arsimin e Lartë (ENQA), si dhe ndikimin që ky vlerësim ka pasur në zhvillimin e brendshëm të Agjencisë.

Në këtë ngjarje rajonale morën pjesë përfaqësues nga agjencitë e sigurimit të cilësisë të gjashtë vendeve të Ballkanit Perëndimor, të cilët diskutuan rreth përgatitjes për vlerësime nga ENQA, forcimit të bashkëpunimit dhe ndarjes së praktikave të suksesshme. Nikoqir i takimit ishte Agjencia Kroate për Sigurimin e Cilësisë në Arsimin e Lartë (ASHE).

Në prezantimin e tij me titull “Roli i vlerësimeve të ENQA në zhvillimin e Agjencisë së Kosovës për Akreditim”, Gashi theksoi se procesi i vlerësimit ka shërbyer si një reflektim i thellë mbi funksionimin e AKA-së dhe një shtytje drejt rritjes së transparencës, pavarësisë institucionale dhe përputhshmërisë me Standardet dhe Udhëzuesit Evropianë për Sigurimin e Cilësisë (ESG).

Ai prezantoi të dhëna konkrete mbi arritjet e AKA-së, si: rritja e numrit të stafit nga 8 në 26, strukturimi i agjencisë, përmirësimi i infrastrukturës digjitale dhe reformimi i manualit të akreditimit. Gjithashtu, ai theksoi se Ligji i ri për AKA-në, i miratuar në vitin 2023, ka qenë një ndër faktorët kryesor që ka mundësuar pavarësinë funksionale të Agjencisë dhe rritjen e besimit të palëve të interesit.

Pjesë e rëndësishme e prezantimit ishin edhe reflektimet mbi sfidat, si kompleksiteti i përputhjes me standardet ESG, interpretimi i tyre në kontekstin lokal dhe faktorët e jashtëm që ndikojnë në funksionimin institucional. “Vlerësimi nga ENQA nuk ishte vetëm një test për ne, por një mundësi për të mësuar, për t’u përmirësuar dhe për të avancuar cilësinë e arsimit të lartë në Kosovë”, tha Gashi.

Në vigjilje të takimit rajonal, drejtori Gashi ka zhvilluar një takim të veçantë me homologen kroate, drejtoren e ASHE, profesoreshën Danijela Horvatek Tomić, me të cilën kanë biseduar për vazhdimin e bashkëpunimit në funksion të ngritjes së cilësisë në arsimin e lartë.

Pjesëmarrja e AKA-së në këtë ngjarje rajonale u vlerësua nga pjesëmarrësit si një kontribut i vlefshëm dhe një shembull i mirë se si një agjenci e akreditimit, mund të përmbushë standardet evropiane për sigurimin e cilësisë dhe të kontribuojë në zhvillimin e përbashkët rajonal.