AKA rishikon Rregulloren e Monitorimit dhe Procedurave Pas-Akredituese

Këshilli Shtetëror i Cilësisë (KSHC) dhe personeli i Agjencisë së Kosovës për Akreditim (AKA), në punëtorinë e mbajtur më 03.03.2025, kanë rishikuar Rregulloren e Monitorimit dhe Procedurave Pas-Akredituese, me qëllim të përmirësimit të vazhdueshëm të cilësisë në institucionet e arsimit të lartë në Kosovë.

Kjo Rregullore synon të vendosë procedura të drejta dhe transparente të monitorimit dhe pas-akreditimit, duke u përshtatur me kontekstin dhe sistemin e sigurimit të cilësisë në Kosovë dhe duke u harmonizuar me legjislacionin kombëtar në fuqi. Gjithashtu, ajo reflekton praktikat më të mira ndërkombëtare dhe standardet evropiane për sigurimin e cilësisë në arsimin e lartë.

Në përputhje me Ligjin për Arsimin e Lartë dhe Ligjin për Agjencinë e Akreditimit të Kosovës, procedurat e monitorimit dhe pas-akreditimit do të zhvillohen për të siguruar që institucionet e arsimit të lartë (IAL) të respektojnë kriteret e përcaktuara për cilësinë akademike dhe standardet institucionale.

Rregullorja shërben si udhëzues për AKA-në, IAL-të, ekspertët ndërkombëtarë dhe publikun e gjerë, duke mundësuar një proces të qartë dhe të kuptueshëm për monitorimin dhe vlerësimin e vazhdueshëm të institucioneve dhe programeve të studimit.

Kjo Rregullore është në përputhje me Standardin 2.3 të Standardeve dhe Udhëzimeve Evropiane për Sigurimin e Cilësisë në Arsimin e Lartë (ESG), i cili kërkon që agjencitë e sigurimit të cilësisë të plotësojnë ciklin e akreditimit me procedura pas-akreditimi që synojnë përmirësimin e qëndrueshëm të institucioneve të arsimit të lartë.

Drafti i Rregullores do të shqyrtohet në mbledhjen e radhës të KSHC-së dhe më pas do të dërgohet për diskutim publik, duke ofruar mundësinë për komente dhe sugjerime nga të gjitha palët e interesuara.