Në vigjilje të vizitës zyrtare në Bruksel, Kryetarja e Këshillit Shtetëror të Cilësisë (KSHC), profesoresha Hasnije Ilazi, dhe Drejtori i Përgjithshëm i Agjencisë së Kosovës për Akreditim (AKA), Naim Gashi, janë pritur nga Ambasadori i Kosovës në Bruksel, Agron Bajrami. Gjatë takimit u diskutua për progresin e AKA-së në proceset e njohjes ndërkombëtare, si dhe për rëndësinë e ndërkombëtarizimit të sistemit të arsimit të lartë në Kosovë.

Kryetarja e KSHC-së e informoi Ambasadorin Bajrami se Kosova ka arritur të bëhet vendi i vetëm në Ballkanin Perëndimor, agjencia kombëtare e së cilës është regjistruar në Regjistrin Evropian për Sigurimin e Cilësisë në Arsimin e Lartë (EQAR). Ajo po ashtu theksoi se AKA është njohur si autoritet akreditues edhe nga Këshilli për Akreditimin e Arsimit të Lartë (CHEA) në Shtetet e Bashkuara të Amerikës, duke u bërë agjencia e parë në Evropë që e gëzon këtë status nga CHEA.

Kryetarja Ilazi tha se këto arritje ndërkombëtare janë rezultat i reformave të thella, përkushtimit institucional dhe punës së vazhdueshme të AKA-së për harmonizimin e sistemit të sigurimit të cilësisë me standardet evropiane dhe ndërkombëtare.

Drejtori i Përgjithshëm i AKA-së, Naim Gashi, e falënderoi Ambasadorin Bajrami për përkrahjen e vazhdueshme ndaj AKA-së në procesin e ndërkombëtarizimit të sistemit të arsimit të lartë. Ai theksoi se mbështetja diplomatike është e rëndësishme për fuqizimin e mëtejshëm të prezencës së AKA-së në mekanizmat ndërkombëtarë të sigurimit të cilësisë.

Ambasadori Bajrami vlerësoi se të arriturat e AKA-së përbëjnë një imazh shumë pozitiv për Kosovën edhe në aspektin diplomatik, duke theksuar se njohjet dhe anëtarësimet ndërkombëtare janë dëshmi e përkushtimit të institucioneve të Kosovës për ndërtimin e një sistemi cilësor dhe të besueshëm të arsimit.

Ai po ashtu shprehu gatishmërinë e Ambasadës së Kosovës në Bruksel për të vazhduar mbështetjen ndaj AKA-së në komunikimin dhe bashkëpunimin me institucionet evropiane, me qëllim të avancimit të mëtejshëm të pozitës së Kosovës në hapësirën evropiane të arsimit të lartë.

Takimi u vlerësua si një hap i rëndësishëm në forcimin e bashkëpunimit ndërinstitucional dhe në promovimin e arritjeve të Kosovës në fushën e arsimit.