Komisioni për Arsim, Shkencë, Teknologji, Inovacion, Kulturë, Rini dhe Sport i Kuvendit të Kosovës, më 12.11.2024 e ka vizituar Agjencinë e Kosovës për Akreditim (AKA), ku janë pritur nga Kryetarja e Këshillit Shtetëror të Cilësisë (KShC), profesoresha Hasnije Ilazi, Drejtori i Përgjithshëm i AKA-së, Naim Gashi, anëtarja e KSHC-së, Mirlinda Batalli si dhe stafi i Agjencisë.

Delegacioni i Kuvendit përbëhej nga Kryetari i Komisionit, Ardian Gola, nënkryetarja Albena Reshitaj si dhe deputetet, Arjeta Fejza, Eliza Hoxha dhe Arjeta Rexhepi.

Kryetarja e KSHC-së, i ka falënderuar deputetët e Komisionit dhe të Kuvendit në përgjithësi, për miratimin e Ligjit për AKA-në, i cili u ka hapur rrugë shumë proceseve pozitive në Agjenci. Kryetarja Ilazi ka thënë se AKA sot është një institucion stabil dhe kredibil, brenda dhe jashtë vendit i cili po ndikon në ngritjen e cilësisë në arsimin e lartë dhe ndërkombëtarizimin e sistemit të arsimit në Kosovë.

Kryetari i Komisionit për Arsim, Ardian Gola e ka falënderuar Bordin dhe stafin e Agjencisë për punën profesionale në funksion të ngritjes së cilësisë në arsimin e lartë. Kryetari Gola ka thënë se bashkëpunimi dhe përkrahja për AKA-në do të vazhdojë edhe në të ardhmen.

Deputetët e Kuvendit i kanë vizituar edhe hapësirat e reja të punës së Agjencisë.