Tiranë, 10 tetor 2025 – Drejtori i Përgjithshëm i Agjencisë së Kosovës për Akreditim (AKA), z. Naim Gashi, mori pjesë si panelist dhe moderator në Konferencën e Politikave të BE-së “Përparimi i sigurimit të cilësisë dhe njohjes në Ballkanin Perëndimor”, të organizuar nga Academic Cooperation Association (ACA) në bashkëpunim me Komisionin Evropian.

Në sesionin tematik “Sistemet e sigurimit të cilësisë në nivel institucional: nga ESG drejt praktikave ndërkufitare”, z. Gashi ndau me përfaqësuesit e agjencive dhe institucioneve të arsimit të lartë nga rajoni dhe Bashkimi Evropian praktikat e mira të regjistrimit të AKA-së në EQAR, duke theksuar se Kosova sot përmendet si shembull i suksesit në sigurimin e cilësisë në arsimin e lartë.

Në sesionin e moderuar nga z. Gashi morën pjesë edhe Aleksandar Šušnjar, Drejtor i EQAR, z. Benjamin Muhamedbegović nga Agjencia për Zhvillimin e Arsimit të Lartë dhe Sigurimin e Cilësisë në Bosnje dhe Hercegovinë, si dhe znj. Eglantina Gishti nga Aleanca Evropiane UNINOVIS.

Në këtë konferencë Gashi foli për reformat e thella në sistemin e arsimit të lartë në Kosovë, të cilat kanë sjellë harmonizimin e plotë të kornizës ligjore dhe institucionale me Standardet dhe Udhëzimet Evropiane për Sigurimin e Cilësisë (ESG).

Ai theksoi rëndësinë e konsensusit nacional për cilësinë në arsimin e lartë, si dhe përfshirjen e të gjithë hisedarëve në proceset vendimmarrëse të AKA-së, duke krijuar një sistem më të hapur, transparent dhe të bazuar në besim të ndërsjellë.

Sipas Gashit, regjistrimi i AKA-së në EQAR nuk përfaqëson vetëm një arritje teknike, por një transformim kulturor që e ka vendosur Kosovën në hartën evropiane të arsimit të lartë si një partner të besueshëm. Ai shtoi se cilësia nuk duhet parë si mekanizëm kontrolli, por si mjet për fuqizim dhe inovacion në universitete.

Në përfundim, z. Gashi theksoi se përvoja e Kosovës dëshmon se edhe sistemet e vogla mund të arrijnë rezultate të mëdha kur udhëhiqen nga vlerat evropiane dhe bashkëpunimi rajonal. Ai i bëri thirrje agjencive të rajonit që të forcojnë bashkëpunimin për ndërtimin e një kulture të përbashkët evropiane të cilësisë në arsimin e lartë.