Këshilli Shtetëror i Cilësisë (KShC) i Agjencisë së Kosovës për Akreditim (AKA), në mbledhjen e mbajtur më 27.11.2024, vendosi kriteret për bartësit e programeve të studimit në fushat e arteve.

Kriteret e reja bazohen në Ligjin për AKA-në, standardet evropiane të cilësisë, me Standardet dhe Manualin e AKA-së për Akreditim. Para marrjes së këtij vendimi, AKA ka diskutuar me përfaqësuesit e institucioneve të arsimit të kartë dhe ka marrë për model praktikat më të mira të disa shteteve evropiane, si Finlanda, Kroacia, Sllovenia, etj.

KSHC vendosi që me rastin e dorëzimit të aplikacioneve të programeve të studimit në fushën e arteve IAL-të duhet të deklarojnë nëse programi me të cilin aplikojnë për akreditim ose riakreditim është teorik apo artistik.

Në rast se programi i studimit është teorik, atëherë kriteret për vlerësimin e bartësve janë te njëjta si për te gjitha programet tjera akademike.

Në rast se programi është artistik, diploma master do të konsiderohet ekuivalente, si dhe do të kërkohet të ofrohen dëshmitë për së paku tri nga kategoritë si vijon:

• Doktoratë në ‘Liberal Arts’;
• Vlerësime të aktiviteteve artistike;
• Çmime për aktivitete artistike;
• Anëtarësim në ansamble dhe juri ndërkombëtare;
• Bashkëpunim në festivale, gara dhe ngjarje të njohura kombëtare dhe ndërkombëtare;
• Ftesa për paraqitje në ngjarje jashtë vendit;
• Bashkëpunim me institucione të njohura artistike kombëtare dhe ndërkombëtare; dhe
• Vlerësime pozitive nga vlerësuesit.

Në këtë mbledhje KSHC ka shqyrtuar dhe ka vendosur për ankesat dhe kërkesat e institucioneve të arsimit të lartë.