Agjencia e Kosovës për Akreditim (AKA), më 22 maj 2025, organizoi në Prishtinë një punëtori gjithëpërfshirëse me përfaqësuesit kryesorë të arsimit të lartë në vend, ku u shqyrtua dokumenti për rishikimin e standardeve të programeve të studimeve të doktoratës.

Takimin e hapi Kryetarja e Këshillit Shtetëror të Cilësisë (KShC), profesoresha Hasnije Ilazi, e cila theksoi se ky proces ka për synim ngritjen e mëtejme të cilësisë në arsimin e lartë, si dhe harmonizimin e standardeve me praktikat më të mira evropiane dhe ndërkombëtare.

Ajo potencoi rëndësinë e partneritetit ndërmjet Agjencisë dhe institucioneve të arsimit të lartë, duke theksuar se përfshirja e tyre në hartimin e politikave dhe rregulloreve përbën një element thelbësor të procesit të vlerësimit dhe zhvillimit cilësor të programeve të studimit.

Në këtë punëtori mori pjesë edhe ekspertja ndërkombëtare, profesoresha kroate Melita Kovačević, e cila prezantoi përvojat më të avancuara evropiane dhe dha rekomandime konkrete për zhvillimin e qëndrueshëm të programeve të doktoratës.

Ajo theksoi rëndësinë e strukturimit të programeve përmes shkollave të doktoratës dhe nevojën për standarde institucionale të qarta, rregullore të dedikuara, staf akademik të kualifikuar dhe burime të mjaftueshme njerëzore e financiare.

Ky proces i rishikimit të standardeve të doktoratës mbështetet nga projekti SHER (Supporting Higher Education Reform), i cili financohet nga Agjencia Austriake për Zhvillim (ADA). Qëllimi i projektit është forcimi i standardeve akademike dhe promovimi i praktikave evropiane në institucionet e arsimit të lartë në Kosovë.