Drejtori i Përgjithshëm i Agjencisë së Kosovës për Akreditim (AKA), Naim Gashi, i shoqëruar nga Udhëheqësja e Divizionit për Buxhet, Merita Rama dhe zyrtarja certifikuese Edona Rama, kanë pritur në takim Drejtorin e Buxhetit në Ministrinë e Financave, Salvador Elmazi, si dhe zyrtaren e lartë për buxhet, Mevlide Shamolli.

Gjatë takimit, drejtuesit e AKA-së shprehën mirënjohjen për mbështetjen e vazhdueshme që Departamenti i Buxhetit në Ministrinë e Financave i ka ofruar Agjencisë në procesin e planifikimit, financimit dhe menaxhimit të buxhetit.

Drejtori i Përgjithshëm, Naim Gashi, falënderoi Ministrinë e Financave për bashkëpunimin dhe përkrahjen e vazhdueshme buxhetore, duke theksuar se kjo mbështetje ka qenë thelbësore për realizimin e objektivave strategjike të AKA-së dhe për zbatimin e standardeve vendore dhe ndërkombëtare në fushën e sigurimit të cilësisë në arsimin e lartë.

Nga ana e tij, Drejtori i Buxhetit, Salvador Elmazi, vlerësoi punën e Agjencisë së Kosovës për Akreditim, duke e cilësuar atë si shembull të menaxhimit të mirë të buxhetit, racionalizimit të shpenzimeve dhe performancës së lartë institucionale.

Me këtë rast, Drejtori i Përgjithshëm i AKA-së i ndau një mirënjohje znj. Mevlide Shamolli, me rastin e pensionimit të saj, në shenjë vlerësimi për kontributin e çmuar dhe mbështetjen e vazhdueshme që i ka dhënë Agjencisë ndër vite. Kontributi i saj ka përfshirë, ndër të tjera, pjesëmarrjen në hartimin e politikave dhe akteve rregullative në përputhje me Ligjin për Buxhetin dhe Ligjin për Menaxhimin e Financave Publike dhe Përgjegjësitë.