Më 29 maj 2025, në kuadër të një punëtorie të organizuar nga Agjencia e Kosovës për Akreditim (AKA), është miratuar dizajni dhe struktura e ueb-faqes së re të institucionit.

Zhvillimi i ueb-faqes së re do të realizohet nga kompania e kontraktuar, në bazë të dizajnit të miratuar nga grupi punues dhe do të financohet nga Agjencia Austriake për Zhvillim (ADA), përmes projektit HEI 25.

Kjo iniciativë vjen si përgjigje ndaj sugjerimeve dhe kërkesave të institucioneve të arsimit të lartë në Kosovë, të cilat gjatë vlerësimeve të fundit kanë theksuar nevojën për avancimin e mëtejmë të prezencës digjitale të AKA-së.

Ueb-faqja e re do të ofrojë një strukturë më të qartë, përmbajtje të përditësuar dhe qasje më të lehtë në dokumente, vendime, standarde dhe raporte të rëndësishme. Ajo do të funksionojë si një platformë transparente dhe funksionale për publikun, institucionet e arsimit të lartë dhe partnerët ndërkombëtarë, duke kontribuar në forcimin e llogaridhënies dhe besimit në punën e Agjencisë.

Ky projekt përfaqëson angazhimin e vazhdueshëm të AKA-së për përmirësimin e shërbimeve dhe komunikimit institucional në përputhje me praktikat më të mira evropiane të sigurimit të cilësisë në arsimin e lartë.