Dy përfaqësues të Agjencisë së Kosovës për Akreditim (AKA), Arianit Krasniqi, Drejtor i Departamentit për Vlerësim dhe Akreditim, dhe Ilirjane Ademaj-Ahmeti, Zyrtare e Lartë për Vlerësim dhe Akreditim, morën pjesë në Forumin Evropian për Sigurimin e Cilësisë 2025 (EQAF), të mbajtur më 12–14 nëntor 2025 në Universitetin Corvinus të Budapestit, Hungari. Forumi, i organizuar nga ENQA, EUA, ESU dhe EURASHE, është ngjarja më e madhe vjetore kushtuar sigurimit të cilësisë në arsimin e lartë në Evropë.

Pjesëmarrja në EQAF 2025 ishte një mundësi e shkëqyeshme për AKA-në që të forcojë tutje bashkëpunimin profesional me institucionet evropiane të sigurimit të cilësisë, institucione të arsimit të lartë dhe ekspertë ndërkombëtarë të fushës. Forumi mblodhi qindra pjesëmarrës për të diskutuar për temën “Sigurimi i Cilësisë në kohë krizash – Sigurimi i stabilitetit, autonomisë dhe bashkëpunimit ndërkombëtar në arsimin e lartë.”

Nëpërmjet diskutimeve në panele të ndryshme, punëtorive dhe shkëmbimeve me kolegë nga e gjithë Evropa, përfaqësuesit e AKA-së patën mundësinë të ndajnë përvoja dhe praktika të mira, si dhe të familjarizohen me zhvillimet aktuale në kontekstin evropian të sigurimit të cilësisë.

Përfshirja në EQAF riafirmon angazhimin e AKA-së për përmirësim të vazhdueshëm, bashkëpunim rajonal dhe përafrim të mëtejmë me standardet dhe trendët evropiane të sigurimit të cilësisë.