Prishtinë, 9 tetor 2025 – Me pjesëmarrjen e përfaqësuesve të institucioneve të arsimit të lartë, Agjencia e Kosovës për Akreditim (AKA) ka publikuar analizën e saj të re tematike me titull “Përmirësimi i kërkimit shkencor përmes mekanizmave të cilësisë”.

Analiza trajton ndikimin e sigurimit të jashtëm të cilësisë në zhvillimin e kërkimit shkencor në institucionet e arsimit të lartë në Kosovë.

Kjo analizë shqyrton në detaje mënyrën se si Standardi i Fushës së Kërkimit i AKA-së – i ndërtuar në përputhje me Standardet dhe Udhëzimet Evropiane për Sigurimin e Cilësisë (ESG) – zbatohet gjatë vlerësimeve institucionale dhe proceseve të akreditimit të programeve studimore. Duke kaluar përtej dokumenteve formale, analiza fokusohet në praktikat reale akademike dhe evidenton se si vlerësimet, rekomandimet dhe proceset e pajtueshmërisë kanë ndikuar në rritjen e cilësisë dhe produktivitetit kërkimor në institucionet e arsimit të lartë.

Në kuadër të publikimit të analizës, AKA organizoi një takim prezantues me përfaqësues të institucioneve të arsimit të lartë, ku u prezantuan gjetjet kryesore dhe u zhvillua një diskutim i hapur mbi mënyrat për forcimin e kapaciteteve kërkimore në nivel institucional. Gjatë takimit, pjesëmarrësit dhanë inpute të vlefshme për nevojat aktuale dhe përmirësimet e mundshme në fushën e kërkimit shkencor.

Analiza tematike e publikuar sjell disa rekomandime të rëndësishme, përfshirë nevojën për integrimin më të fuqishëm të kërkimit shkencor në strategjitë institucionale të cilësisë, përmirësimin e infrastrukturës dhe burimeve për kërkim, si dhe nxitjen e bashkëpunimit ndërkombëtar dhe ndërinstitucional për rritjen e ndikimit të kërkimit.

Po ashtu, theksohet rëndësia e përdorimit të mekanizmave të jashtëm të sigurimit të cilësisë si mjete për zhvillim të vazhdueshëm, duke i shndërruar proceset e vlerësimit në mundësi për përmirësim afatgjatë.

👉 Shkarko analizën e plotë këtu.