Gjatë një vizite në Universitetin e Gjakovës “Fehmi Agani”, kryetarja e Këshillit Shtetëror të Cilësisë (KShC), profesoresha Hasnije Ilazi, ka thënë se institucioni që ajo drejton nëpërmes vendimeve të fundit synon ngritjen e cilësisë në arsimin e lartë.

Kryetarja Ilazi ka thënë se KShC po ndërton një raporte komunikimi të ndërsjellë me të gjitha institucionet e arsimit të lartë, me qëllim të konsultimit të të gjithë akterëve për vendimmarrje në procese të rëndësishme që lidhen me cilësinë në arsim.

Profesoresha Ilazi tha se aktualisht në Agjencinë e Akreditimit dhe në KShC janë intensifikuar punët për avancimin e rregullativës së brendshme dhe dokumenteve strategjike me qëllim të zhvillimit të sistemit të arsimit të lartë konform standardeve evropiane të cilësisë.

Rektori i Universitetit të Gjakovës, Artan Nimani, ka thënë se gjatë vitit të fundit kanë pasur një bashkëpunim të shkëlqyeshëm me Agjencinë e Akreditimit, pasi që kanë përfunduar me sukses procesin akreditimit institucional dhe të disa programeve akademike.

Rektori Nimani i ka mirëpritur vendimet e fundit të KShC-së që lidhen me publikimet shkencore të bartësve të programeve akademike dhe ka shtuar se Universiteti i Gjakovës e plotëson lehtësisht këtë kriter.

Drejtuesit e KShC-së dhe AKA-së janë takuar edhe me përfaqësuesit e studentëve të Universitetit të Gjakovës, me të cilët kanë biseduar për idetë e tyre për cilësinë në arsimin e lartë. Në takim është njoftuar se AKA ka fituar një projekt nga Ambasada Amerikane i cili ka për qëllim rritjen e përfshirjes së studentëve në vendimmarrje.