Drejtori i Përgjithshëm i Agjencisë së Kosovës për Akreditim (AKA), Naim Gashi, gjatë një pritje që i bëri në Prishtinë, Menaxherit të Programit të Agjencisë për Zhvillim të Austrisë (ADA), Miguel Alves De Morais Neto, e ka falënderuar për përkrahjen e vazhdueshme në ngritjen e kapaciteteve teknike dhe profesionale për AKA-në.

Drejtori Gashi ka thënë se përkrahja teknike dhe financiare nga projektet e financuara nga ADA, siç janë HEI 25, Heras Plus dhe QAINT, kanë ndikuar në rritjen e kapaciteteve teknike dhe profesionale të AKA-së në funksion të ngritjes së cilësisë në arsimin e lartë.

Drejtori i AKA-së përmendi projektin më të rëndësishëm, E Akreditimi 2.0, i cili aktualisht është duke u realizuar me financimin e ADA nëpërmes projektit HEI 25. Ky projekt do të mundësojë digjitalizimin e shumicës së proceseve në AKA.

Menaxheri Morais Neto ka vizituar hapësirat e reja të AKA-së, të cilat do të vihen në funksion të stafit të Agjencisë deri në fund të këtij muaji.