Këshilli Shtetëror i Cilësisë (KShC) dhe drejtues të Agjencisë së Kosovës për Akreditim (AKA) kanë zhvilluar një vizitë në institucionin e arsimit të lartë RIT Kosova, ku kanë biseduar me menaxhmentin e këtij institucioni për bashkëpunimin dhe përpjekjet e përbashkëta në ngritjen e cilësisë në arsimin e lartë.

Kryetarja e KShC-së, profesoresha Hasnije Ilazi, ka thënë se tashmë është krijuar një traditë e vizitave në institucionet e arsimit të lartë në Republikën e Kosovës, me qëllim të informimit të tyre për zhvillimet kryesore në Agjenci, si dhe për të marrë rekomandime që kontribuojnë në përmirësimin e proceseve të sigurimit të cilësisë.

Gjatë takimit, kryetarja Ilazi i njoftoi përfaqësuesit e RIT Kosova me zhvillimet më të fundit në procesin e internacionalizimit të sistemit të arsimit të lartë, përfshirë anëtarësimet ndërkombëtare të Agjencisë së Kosovës për Akreditim.

Delegacioni i AKA-së përbëhej nga Drejtori i Përgjithshëm, Naim Gashi, anëtarët e KShC-së, profesori Avni Berisha dhe profesoresha Mirlinda Batalli, si dhe Drejtori për Akreditim, Arianit Krasniqi.

Delegacioni u prit nga përfaqësuesit e menaxhmentit të RIT Kosova: Edmond Muhaxheri, profesor asistent dhe Drejtor Financiar; Lavon Bajrami, Drejtor i Administratës; Leandrit Mehmeti, ndihmës Dekan; dhe Xhavit Gashi, Drejtor për Zhvillim.

Përfaqësuesit e RIT Kosova vlerësuan transparencën dhe bashkëpunimin që Agjencia e Kosovës për Akreditim ofron ndaj institucioneve të arsimit të lartë, duke theksuar përfshirjen e tyre në dëgjime publike, konsultime dhe procese të dhënies së rekomandimeve për dokumente rregullative dhe strategjike.

Ata gjithashtu uruan Agjencinë e Kosovës për Akreditim për anëtarësimin në CHEA, si dhe për regjistrimin e saj në Regjistrin Evropian për Sigurimin e Cilësisë në Arsimin e Lartë (EQAR). Sipas tyre, anëtarësimi në CHEA është veçanërisht i rëndësishëm për RIT Kosova, duke qenë se ky institucion është i lidhur me sistemin amerikan të arsimit të lartë.

Agjencia e Kosovës për Akreditim mbetet e përkushtuar për të vazhduar bashkëpunimin me institucionet e arsimit të lartë, me qëllim të forcimit të kulturës së cilësisë, transparencës dhe zhvillimit të arsimit të lartë në Kosovë.