Prishtinë, 20 tetor 2025 – Agjencia e Kosovës për Akreditim (AKA) ka miratuar Politikat e Privatësisë, një dokument institucional që përcakton mënyrën e mbledhjes, përpunimit dhe mbrojtjes së të dhënave personale në përputhje me Ligjin Nr. 06/L-082 për Mbrojtjen e të Dhënave Personale dhe legjislacionin e Bashkimit Evropian.
Ky dokument u miratua në punëtorinë dyditore të organizuar më 16 dhe 17 tetor 2025.
Politikat e miratuara garantojnë transparencë, siguri dhe mbrojtje të të dhënave për të gjitha palët që bashkëpunojnë me Agjencinë, duke përfshirë institucionet e arsimit të lartë, ekspertët, palët kontraktuese dhe publikun.
Në kuadër të dokumentit, janë përcaktuar qartë procedurat për mbledhjen, përdorimin, ruajtjen dhe ndarjen e të dhënave personale, si dhe të drejtat e individëve për qasje, përditësim dhe ankimim në rast të shkeljes së privatësisë.
Sipas dokumentit, Drejtori i Përgjithshëm i AKA-së do të emëroj zyrtarin përgjegjës për mbrojtjen e të dhënave personale, i cili do të mbikëqyrë zbatimin e politikave dhe bashkëpunimin me Agjencinë për Informim dhe Privatësi (AIP).
Miratimi i Politikave të Privatësisë përfaqëson një hap të rëndësishëm drejt modernizimit institucional dhe digjitalizimit të plotë të shërbimeve të AKA-së, duke përforcuar besueshmërinë dhe përputhshmërinë me standardet ndërkombëtare të sigurimit të cilësisë.
Ky dokument do të publikohet në ueb faqen e AKA-së, pasi që të merret miratimi i Agjencisë për informim dhe privatësi.
Në këtë punëtori u diskutua gjithashtu versioni i fundit i ueb faqes së re të Agjencisë, e cila është zhvilluar me përkrahjen e projektit HEI25, të financuar nga Agjencia Austriake për Zhvillim (ADA). Ueb faqja e re pritet të rrisë transparencën, komunitetit akademik, studentëve dhe publikut në informacion dhe efikasitetin e komunikimit ndërmjet AKA-së dhe institucioneve të arsimit të lartë.