Më 25 qershor 2026, Divizioni për Vlerësim dhe Akreditim i Agjencisë së Kosovës për Akreditim organizoi një takim informues me përfaqësuesit dhe koordinatorët e institucioneve të arsimit të lartë në Republikën e Kosovës, në kuadër të përgatitjeve për procesin e akreditimit 2027/2028.

Takimi u udhëhoq nga z. Arianit Krasniqi, Drejtor i Departamentit për Vlerësim dhe Akreditim, i cili prezantoi procedurat e aplikimit për akreditim dhe riakreditim institucional, si dhe për akreditim dhe riakreditim të programeve të studimit.

Gjatë prezantimit, pjesëmarrësit u informuan mbi mënyrën e aplikimit përmes platformës elektronike e-Akreditimi, dokumentacionin që duhet të dorëzohet, si dhe hapat që duhet të ndiqen gjatë procesit të aplikimit. Gjithashtu, u ofruan sqarime lidhur me përdorimin e platformës dhe kërkesat procedurale, ndërsa pjesëmarrësit patën mundësinë të parashtrojnë pyetje dhe të marrin përgjigje mbi çështjet që lidhen me procesin e akreditimit.

Në përputhje me legjislacionin në fuqi dhe afatet e përcaktuara për zhvillimin e procesit të akreditimit, institucionet u njoftuan se platforma elektronike e-Akreditimi do të jetë e hapur për pranimin e aplikimeve nga 1 korriku deri më 31 korrik 2026.

Përmes organizimit të takimeve informuese dhe ofrimit të udhëzimeve të nevojshme, Agjencia e Akreditimit e Kosovës synon të mbështesë institucionet e arsimit të lartë në përgatitjen e aplikimeve dhe të sigurojë një proces transparent, efikas dhe në përputhje me standardet e sigurimit të cilësisë në arsimin e lartë.