Kryetarja e Këshillit Shtetëror të Cilësisë (KSHC), profesoresha Hasnije Ilazi, dhe Drejtori i Përgjithshëm i Agjencisë së Kosovës për Akreditim (AKA), Naim Gashi, gjatë pjesëmarrjes në Forumin e Anëtarëve të Asociacionit Evropian për Sigurimin e Cilësisë në Arsimin e Lartë (ENQA), të mbajtur më 22–24 prill 2026 në Budapest, kanë takuar homologë dhe delegacione nga mbarë Evropa.

Forumi është organizuar nga Komiteti Hungarez i Akreditimit (MAB).

Delegacioni i AKA-së, fillimisht, është takuar me nikoqirët e ngjarjes, përkatësisht me Presidentin e Komitetit Hungarez të Akreditimit (MAB), Prof. Dr. János Ede Szilágyi, si dhe me Drejtorin e Përgjithshëm të MAB-it, Dr. Péter Levente Lakatos.

AKA dhe MAB kanë të nënshkruar një marrëveshje bashkëpunimi në fushën e sigurimit të cilësisë në arsimin e lartë, e cila paraqet një bazë të rëndësishme për thellimin e bashkëpunimit ndërinstitucional dhe shkëmbimin e përvojave profesionale.

Në kuadër të forumit, delegacioni nga Kosova ka marrë pjesë në sesionet plenare dhe tematike, kushtuar forcimit të besimit në arsimin e lartë, zhvillimeve lidhur me rishikimin e ESG-së, si dhe politikave evropiane që ndikojnë në sigurimin e cilësisë në arsimin e lartë. Në agjendë ka qenë gjithashtu edhe mbledhja e Asamblesë së Përgjithshme të ENQA-së.

Gjatë qëndrimit në Budapest, delegacioni i AKA-së ka takuar Presidenten e ENQA-së, Cristina Ghițulică, Drejtorin e EQAR-it, Aleksandar Susnjar, Zëvendëspresidentin e ENQA-së, Patrick Van den Bosch nga Belgjika, anëtaren e Bordit të ENQA-së, Doris Herrmann nga Gjermania, si dhe përfaqësues të agjencive homologe evropiane.